Францыск Скарына

Францыск Скарына (1490, Полацк — 1551, Прага) — беларускі першадрукар, асветнік-гуманіст.

Францыск Скарына

Нараджэнне

1490 Полацк

Смерць

1551 Прага

Выказванні Францыска Скарыны

Богу въ Троици единому ко чти и ко славе, Матери его Пречистой Марии к похвале. Всем небесным силам и святым его к веселію, Людем посполитым к доброму научению.

— кніга «Іоў» (1517)

Веруй в Бога единаго, А не бери надармо имени его, Помни дни светые святити, Отца и матку чтити. Не забивай ни едина И не делай греху блудна. Не вкради, что дружнего, А не давай сведецтва лживага. Не пожедай жены ближнего, Ни имения или речи его.

— кніга «Зыход» (1519)

Не копай под другом своим ямы — Сам въвалишся в ню. Не став Амане Мардохею шибинице Сам повиснеш на ней.

— кніга «Эсфір» (1519)

Выказванні пра Францыска Скарыну

Вашы яснавяльможнасці, панове вучоныя! Я выклікаў Вашыя яснавяльможнасці з наступнай прычыны. У Падую прыбыў вельмі вучоны, але бедны малады чалавек, доктар свабодных мастацтваў, родам з вельмі аддаленых краін, якія ляжаць на адлегласці чатырох тысяч міль, а можа і больш ад нашага слаўнага горада. Прыбыў малады чалавек для таго, каб памножыць славу і бляск Падуі, а таксама квітнеючага збору філосафаў універсітэта і нашай свяшчэннай калегіі. Ён просіць калегію ў знак асаблівай ласкі падвергнуць яго іспытам у галіне медыцыны... Калі ўгодна Вашым яснавяльможнасцям, я прадстаўлю вам гэтага маладога чалавека. Зваць яго Францыск, ён сын нябожчыка Лукі Скарыны з Полацка, русін.

— Тадэа Мусаці

— царква св. Урбана, Падуя, 5 лістапада 1512 года

Мы, Фердынанд і г. д., абвяшчаем гэтай граматай, што колішні доктар Францішак Рус Скарына з Полацка, які некалі тут жыў, наш садоўнік — у гэтым каралеўстве чэшскім быў чужаземцам — сышоў на вечны спакой і пакінуў пасля сябе сына Сімяона Руса і пэўную маёмасць, паперы, даўгі і іншае, яму належнае. І прасіў нас вышэйзгаданы Сімяон выдаць грамату і агульны ўказ на выпадак таго, што калі б ён знайшоў што-небудзь з маёмасці вышэйзгаданага свайго бацькі, то каб яму была выдадзена і аказана дапамога.

— Фердынанд I

— давераная грамата 29 студзеня 1552 года